Gen 13 | NdeIBE | STEP | Ngakho u-Abhrama wasuka eGibhithe waya eNegebi, kanye lomkakhe lakho konke ayelakho, loLothi ehamba laye.

Genesis 13

U-Abhrama loLothi Bayehlukana

1 Ngakho u-Abhrama wasuka eGibhithe waya eNegebi, kanye lomkakhe lakho konke ayelakho, loLothi ehamba laye. 2 UAbhrama wayesenothile kakhulu ngezifuyo langesiliva legolide.

3 Esuka eNegebi wazula lapha lalapha waze wafika eBhetheli, endaweni eyayiphakathi kweBhetheli le-Ayi lapho ayemise khona ithente lakhe kuqala 4 njalo lapho ayeqale khona ukwakha i-alithare. Khonapho u-Abhrama wadumisa igama likaJehova.

5 Kwathi uLothi owayehamba lo-Abhrama, laye wayelemihlambi yezimvu lezinkomo lamathente. 6 Kodwa ummango wawungabeneli bonke nxa behlala ndawonye, ngoba impahla yabo yayinengi kakhulu isala ukuthi bahlale ndawonye. 7 Kwaba lokuxabana phakathi kwabelusi baka-Abhrama labelusi bakaLothi. AmaKhenani lamaPherizi lawo ayehlala kulelolizwe ngalesosikhathi.

8 Yikho uAbhrama wasesithi kuLothi, “Kasingalwi mina lawe, kumbe abelusi bakho labami, ngokuba singabazalwane. 9 Umhlaba wonke kawusobala phambi kwakho na? Kasehlukane. Ungaya kwesokhohlo mina ngizakuya kwesokunene; ungaya kwesokunene mina ngizakuya kwesokhohlo.”

10 ULothi wakhangela wabona ukuthi lonke igceke laseJodani lalilamanzi amanengi, njengesivande sikaJehova, njengelizwe laseGibhithe kusiya eZowari. (Ngalesisikhathi uJehova wayengakabhubhisi iSodoma leGomora.) 11 Yikho uLothi wazikhethela lonke igceke laseJodani, wasesuka waya empumalanga. Amadoda la womabili ehlukana:

12 U-Abhrama wahlala elizweni laseKhenani, kwathi uLothi wahlala phakathi kwamadolobho asemagcekeni wamisa amathente akhe duzane leSodoma. 13 Abantu baseSodoma babexhwalile besenza izono ezinkulu kuJehova.

14 UJehova wathi ku-Abhrama ngemva kokuba uLothi esesukile kuye, “Phakamisa amehlo akho asuke lapho okhona, ukhangele enhla leningizimu, empumalanga lentshonalanga. 15 Lonke ilizwe olibonayo ngizalinika wena kanye lesizukulwane sakho lanini. 16 Ngizakwenza isizukulwane sakho sibe njengothuli lomhlabathi, okokuthi nxa ekhona ongabala uthuli, lesizukulwane sakho sibe lokubalwa. 17 Hamba udabule ubude lobubanzi belizwe, ngokuba ngiyakupha lona.”

18 Ngakho u-Abhrama wathutha amathente akhe wahamba wayakwakha eduze kwezihlahla ezinkulu zikaMamure, eHebhroni, lapho akhela khona uJehova i-alithare.